Kannt þú að fljúga flugvél???

Við keyptum okkur flugmiða til íslands í vikunni (við ætlum nefnilega ekki að koma með skipi). Það þarf víst að fara að gera Atla að manni og ferma hann. Hann átti að vera fermdur í fyrra, þannig að það er ekki seinna vænna. Skömmu eftir að við vorum búin að bóka flugið fékk ég hringingu frá Icelandair og ég var spurður hvort ég kynni nokkuð að fljúga flugvél! Ég sagði að svo væri ekki. „Allt í lagi" sagði gaurinn sem hringdi „við erum nefnilega búnir að segja upp svo mörgum flugmönnum, og erum að reyna að spara svo mikið að okkur datt í hug að athuga hvort að farþegarnir gætu bara ekki flogið sjálfir!" Snilldarhugmynd hjá þeim! Við komum til Fróns og verðum þar í 10 daga í ágúst.

Annasöm vika framundan. Við Guðrún eigum annars 8 ára brúðkaupsafmæli þann 1.júlí. Það ku vera tengt við „brons" hér í landi, en ég get með engu móti fundið út hvort að það er það sama á íslandi! Fínt að fá „brons" við erum þá að minnsta kosti komin í verðlauasæti!

Á föstudaginn er svo þjóðhátíðardagur Bandaríkjanna... með tilheyrandi húllumhæi. Hátíðarhöldin byrja á fimmtudaginn.... því að þeir þurfa alltaf að super-siza all hér í þessu ágæta landi!

Guðrún fékk allt í einu þá flugu í höfuðið að fara að hlaupa maraþonhlaup í október. Það leist mér vel á..... nema þá fóru af stað í mér þankagangar um hvort ég ætti að hlaupa með.... henni til skemmtunar og yndisauka. Hún er heimsfrægur „milli-landa-hlaupari" þannig að þetta verður örugglega ekkert mál fyrir hana. Ég er hins vegar aðallega þekktur fyrir að vera latur fótboltamaður og mér finnst einstaklega leiðinlegt að hlaupa. Hins vegar veit ég að Bjössi hefur aldrei hlaupið maraþonhlaup þannig að þetta er kannski tækifæri fyrir mig..... að eiga betri tíma en hann í einhverju hlaupi! Ég fór a.m.k. út að hlaupa í dag og hljóp í kring um húsið, svo í kring um bílinn og síðast en ekki síst hljóp ég í kring um skottið á refnum. Á morgun ætla ég að hlaupa í kringum einiberjarunn! Ég læt vita hvernig þessum hugsana-þanka-maraþon-gangi framvindur.

Kveð að sinni.... Þórir

Athugasemdir

[Ragga (IP-tala skráð) 30.6.2008 kl. 13:34]

til hamingju með daginn á morgun, það ku vera sama fyrirkomu lag á milli landa ef marka má upplýsingarnar af eftirfarandi link:

 http://brudurin.is/athofn/hjatru_og_hefdir/?ew_news_onlyarea=&ew_news_onlyposition=1&cat_id=1390&ew_1_a_id=757

 Gangi ykkur allt í haginn, kveðja frá Selfossinu

[Guðrún E Jak. (IP-tala skráð) 1.7.2008 kl. 21:53]

Til hamingju með daginn!

Það er Gúmmískór um verslunarmannahelgina...þú nottlega skverar þér í flugnám og mætir! Er haggi....!?